ბათუმის შოთა რუსთაველის სახელმწიფო უნივერსიტეტის ნიკო ბერძენიშვილის ინსტიტუტის ფოლკლორის, დიალექტოლოგიისა და ემიგრანტული ლიტერატურის კვლევის განყოფილების მთავარი მეცნიერ-თანამშრომლის ნანი გუგუნავას 80 წლისადმი მიძღვნილი საიუბილეო სხდომა გაიმართა. მკვლევარს იუბილე მიულოცეს, წარმატებები უსურვეს და მის ღვაწლზე ისაუბრეს უნივერსიტეტის რექტორმა მერაბ ხალვაშმა, აჭარის ა.რ. განათლების, კულტურისა და სპორტის მინისტრმა ინგა შამილიშვილმა, მკვლევრებმა და პროფესორ-მასწავლებლებმა. ღვაწლმოსილ მეცნიერსა და პედაგოგს წარმატებული პროფესიული საქმიანობისათვის ბსუ-ს რექტორმა სიგელი და სამახსოვრო საჩუქარი გადასცა. ნანი გუგუნავა ემიგრანტი მწერლებისა და სოციოლოგების შემოქმედებას იკვლევს.

ნიკო ბერძენიშვილის ინსტიტუტის ფოლკლორის, დიალექტოლოგიისა და ემიგრანტული ლიტერატურის კვლევის განყოფილების უმცროსმა მეცნიერ-თანამშრომელმა მონაწილეობა მიიღო აკაკი შანიძის დაბადებიდან 130 წლისადმი მიძღვნილ სამეცნიერო კონფერენციაში. მკვლევარმა კოლეგებს მოხსენება წარუდგინა თემაზე: „კაპანდიბის განმარტებისათვის“. ორდღიანი კონფერენციის თემატიკა მრავალფეროვანი იყო, მოიცავდა როგორც უცნობ მასალებს მეცნიერის პირადი არქივიდან, ასევე მეცნიერის სამოღვაწეო დარგებსა და მიმართულებებს; წარმოჩენილი იყო აკაკი შანიძის ღვაწლი ქართული გრამატიკული აზრის განვითარების ისტორიაში, მისი კვლევითი მეთოდოლოგიები და შედეგები, რაც განსაკუთრებულ მნიშვნელობას ანიჭებს მის მეცნიერულ მემკვიდრეობას.

ირაკლი ფაღავას, ირინე ვარშალომიძის, სევერიან თურქიას ავტორობით გამოიცა მონიგრაფია „არაბული მონეტების მიმოქცევა სამხრეთ-დასავლეთ საქართველოში“. წიგნში განხილულია საქართველოსა და არაბების პოლიტიკური ურთიერთობები, არაბების ლაშქრობები დასავლეთ საქართველოში, არაბული მონეტების მიმოქცევის თავისებურებანი. ნაშრომში გამოქვეყნებულია ზოტისა და ხელვაჩაურის განძები, ასევე, აჭარის ტერიტორიაზე შემთხვევით მოპოვებული ცალკეული ეგზემპლარების სრული კატალოგი, მოცემულია მეცნიერული კომენტარები, გამოყოფილია ახალი ნუმიზმატიკური რაიონი. მოზიდულია პარალელური მასალა. სამეცნიერო მიმოქცევაში შეტანილია 180 ახალი მონეტა. ნაშრომს თან ახლავს ფოტოტაბულები.

კრებულში „ბათუმი - წარსული და თანამედროვეობა“ შეტანილია VII საერთაშორისო სამეცნიერო კონფერენციაზე - „ბათუმი - წარსული და თანამედროვეობა“ - წაკითხული მოხსენებები. ნაშრომები ეხება ქალაქ ბათუმის ისტორიას, არქეოლოგიას, არქიტექტურას, ტოპონიმიკას, ქალაქის თანამედროვე ყოფის, კულტურის, ტურიზმის, კონფესიური ვითარებისა და დემოგრაფიის საკითხებს. კრებულში ასახვა ჰპოვა იმ რეკომენდაციებმა და წინადადებებმა, რომელიც ეხება ქალაქის დაგეგმარების, ზღვის ნაპირგამაგრების, გონიო-ფიჭვნარს შორის საერთო ტურისტული ზონის შექმნის და სხვა საკითხებს.

მკითხველმა ნიკო ბერძენიშვილის ინსტიტუტის შრომების კრებული მიიღო. გამოცემის XII ტომში შესული სამეცნიერო სტატიები ძირითადად მოიცავს სამხრეთ-დასავლეთ საქართველოს ისტორიას, არქეოლოგიას, ეთნოლოგიას, ფოლკლორს და დიალექტოლოგიას. კრებულში აგრეთვე წარმოდგენილია მეცნიერების სხვა დარგის საკითხებს, რომლებიც დღემდე ნაკლებად ცნობილი ან სრულიად უცნობი იყო მეცნიერული კვლევით დაინტერესებული და ფართო მკითხველისათვის. გამოკვლევებს საფუძვლად უდევს სამეცნიერო საექსპედიციო და სამივლინებო მასალები, საარქივო და ლიტერატურის მონაცემები.