ბსუ-ში „ერაზმუს+“-ის პროექტის „ინოვაციები კურიკულუმში სოციალური ჩართულობის მხარდასაჭერად" (Curriculum Innovation for Social Inclusion – CISI) ფარგლებში, შეხვედრები გაიმართა სტუდენტებთან და აჭარის საგანმანათლებლო რესურსცენტრებისა და საჯარო სკოლების წარმომადგენლებთან. „ერაზმუს+“-ის პროექტ CISI-ის კოორდინატორმა, პროფესრომა თამარ მახარაძემ და პროექტის მენეჯერმა ბსუ-ში, პროფესორმა ნანა მაკარაძემ მონაწილეებს პროექტის ფარგლებში მომზადებული „სპეციალური მასწავლებლის მომზადების საგანმანათლებლო პროგრამა“ და სასწავლო რესურსების წარუდგინეს.

ბათუმის შოთა რუსთაველის სახელმწიფო უნივერსიტეტში ევროკომისიის მიერ დაფინანსებული პროექტის „კვლევის პასუხისმგებლიანად წარმართვა – კვლევის კეთილსინდისიერება და ეთიკა ქართულ უნივერსიტეტებში (ETHICS)“ განმახორციელებელი პერსონალის შიდა სამუშაო შეხვედრა გაიმართა. შეხვედრაზე მონაწილეებმა განხილეს პროექტის ერთ-ერთ პარტნიორ ინსტიტუციაში - აწსუ-ში, 11-13 ოქტომბერს გამართული ტრენერთა გადამზადების 3-დღიანი სამუშაო შეხვედრის დეტალები, ბსუ-ს გუნდის მიერ შესასრულებელი სამუშაოები და პროექტის სამომავლო გეგმები. ტრენერთა ტრენინგის მონაწილეებმა კოლეგებს გაუზიარეს შეხვედრის ფარგლებში მიღებული გამოცდილება და ტრენინგების ჩასატარებლად მოსამზადებელ სამუშაოებზე შეთანხმდნენ.

ბათუმის შოთ რუსთველის სახელმწიფო უნივერსიტეტში სეზონური სკოლა „კვლევის მეთოდები განათლებაში“ გაიხსნა. სწავლებას ილიას სახელმწიფო უნივერსიტეტის ასოცირებული პროფესორი თამარ ბრეგვაძე და კავკასიის უნივერსიტეტის ასოცირებული პროფესორი სიმონ ჯანაშია უძღვებიან. პროფესორ-მასწავლებლები და სტუდენტები ოთხი დღის განმავლობაში გაეცნობიან ისეთ აქტუალურ საკითხებს, როგორიცაა: კვლევის დიზაინი, თვისებრივი კვლევის მეთოდის მიმოხილვა, საკვლევი კითხვისა და კვლევის ამოცანების განსაზღვრა, კონცეპტუალური ჩარჩოს შემუშავება, მონაცემთა შეგროვების ტექნიკა, მონაცემთა ანალიზი და კვლევის გეგმის შემუშავება.

16-18 ოქტომბერს, საქართველოს ტექნიკურ უნივერსიტეტში გამართულ Horizon Europe Proposal Writing Camp for Georgia პროექტის „წერისა და კონსულტაციის ბანაკის“ სამუშაო შეხვედრებში მონაწილეობა მიიღეს ბსუ-ს ჰუმანიტარულ მეცნიერებათა ფაკულტეტის ხარისხის უზრუნველყოფის სამსახურის უფროსმა, ასოცირებულმა პროფესორმა ივდით დიასამიძემ, ასისტენტ პროფესორმა ლია დავითაძემ და ასოცირებულმა პროფესორმა ხათუნა ბერიძემ. ბანაკის სპიკერებმა მათიას ვურხმა და ანელი როუზმა მონაწილეებს „ჰორიზონტი ევროპას" სტანდარტებით გათვალისწინებული საპროექტო წინადადებების შექმნის დეტალები გააცნეს. სამუშაო შეხვედრის მონაწილეებმა იმუშავეს როგორც ინდივიდუალურ, ასევე ჯგუფურ რეჟიმში, ასევე გამარჯვებული პროექტების წარმომადგენლებმა საკუთარი წარმატების ისტორიის შესახებ ისაუბრეს და პოტენციურ აპლიკანტებს საკუთარი გამოცდილებები გაუზიარეს.

ბსუ-ს პროფესორმა თამარ სირაძემ, ასოცირებულმა პროფესორებმა მარინა ნაგერვაძემ და თათია ნაკაშიძე-მახარაძემ ევროკომისიის მიერ დაფინანსებული პროექტის „კვლევის პასუხისმგებლიანად წარმართვა – კვლევის კეთილსინდისიერება და ეთიკა ქართულ უნივერსიტეტებში (ETHICS)“ ფარგლებში ჩატარებულ ტრენერთა ტრენინგში მიიღეს მონაწილეობა. შეხვედრას უძღვებოდნენ ამსტერდამის თავისუფალი უნივერსიტეტის, მასარიკის უნივერსიტეტისა და აკადემიური კეთილსინდისიერების ევროპული ასოციაციის დარგის ექსპერტები. ETHICS-ის პროექტის მიზანია კვლევის ეთიკისა და კეთილსინდისიერების მიმართულებით არსებული მექანიზმების, პროცედურებისა და სერვისების გაუმჯობესება უნივერსიტეტების დონეზე.