ლიტერატურულ კლუბში გაიმართა ილიას უნივერსიტეტის პროფესორის, თამარ ცოფურაშვილის საჯარო ლექციები თემაზე: „სამოქალაქო თავისუფლების რამდენიმე ასპექტისათვის“. ლექცია შეეხებოდა პოლიტიკური თავისუფლების ცნების გენეოლოგიას. განხილულ იქნა ამ კონცეპტის ჩამოყალიბება დაწყებული ანტიკურობიდან (პლატონი), ხელშეკრულების თეორეტიკოსების (ჯობსი, ლოკი) ნააზრევამდე, ასევე გვიანდელი განმანათლებლობის წარმომადგენლების (ჯონ სტიუარტ მილი, ფიხტე) ნააზრევი. ლექციებზე მსჯელობის საგანი იყო ლიბერალური დემოკრატიისთვის ისეთი საკვანძო ცნებების თეორიულ-ფილოსოფიური საზრისები, როგორებიცაა უფლება, თანასწორობა, აღიარება. ნაჩვენები იყო, ისტორიულად თუ როგორ იცვლებოდა საზოგადოების „სხვად” სახლედებული ნაწილის რაობა.

ბათუმის შოთა რუსთაველის სახელმწიფო უნივერსიტეტის ემერიტუს პროფესორ ამირან კახიძისა და ჰუმანიტარულ მეცნიერებათა ფაკულტეტის პროფესორ შოთა მამულაძის ავტორობით ქართულ-ინგლისურენოვანი წიგნი „აჭარის არქეოლოგიური ძეგლები“ გამოიცა. ნაშრომში წარმოდგენილია აჭარის ტერიტორიაზე გასული საუკუნის 60-იანი წლებიდან დაწყებული დღემდე აღმოჩენილი ნივთიერი კულტურის ძეგლები. არტეფაქეტების ძირითადი ნაწილი ავტორთა საველე არქეოლოგიური კვლევა-ძიების შედეგადაა მოპოვებული და უახლესი აღმოჩენების დიდი ნაწილი უშალოდ ეხმაურება ზოგადსაკაცობრიო პრობლემებს. წიგნი „აჭარის არქეოლოგიური ძეგლები“ განკუთვნილია დარგის სპეციალისტებისა და საქართველოს ისტორიით დაინტერესებული მკითხველებისათვის.

21-26 აპრილს ტრაპიზონში მეორედ გაიმართა ტრადიციული საერთაშორისო ლიტერატურული ფესტივალი, რომელშიც საქართველოს, თურქეთის, რუსეთის, ირანისა და აზერბაიჯანის მწერლებმა, პოეტებმა და ლიტერატურათმცოდნეებმა მიიღეს მონაწილეობა. ყოველ მონაწილე ქვეყანას ფესტივალის ერთი დღე დაეთმო. ქართული ენისა და ლიტერატურის დღეს ქალაქმა სურმენემ უმასპინძლა. ქართულმა დელეგაციამ, რომელშიც შედიოდნენ ქუთაისისა და ბათუმის სახელმწიფო უნივერსიტეტების წარმომადგენლები, სურმენეს კულტურის ცენტრში შეკრებილ საზოგადოებას გააცნეს ქართული დამწერლობის, ლიტერატურისა და ქართულ-აღმოსავლური კულტურულ-ლიტერატურული ურთიერთობების ისტორია. ბსუ პროფესორმა რამაზ ხალვაშმა წაიკითხა მოხსენება თემაზე: „შოთა რუსთაველი და მისი „ვეფხისტყაოსანი“.

ჰუმანიტარულ მეცნიერებათა ფაკულტეტის ოთხმა სტუდენტმა მონაწილეობა მიიღო ივანე ჯავახიშვილის სახელობის თბილისის სახელმწიფო უნივერსიტეტის კლასიკური ფილოლოგიის, ბიზანტინისტიკისა და ნეოგრეცისტიკის ინსტიტუტის სტუდენტთა III სამეცნიერო კონფერენციის - „ანტიკურობის თანამედროვეობა“ - მუშაობაში. ზვიად ჩხენკელმა კონფერენციაზე მოხსენება წარადგინა თემაზე: გონიო - აფსაროსის 2016 წლის ექსპედიციის შედეგები (ხელმძღვანელი, პროფ. შ. მამულაძე), ლუკა ლელაძემ - მითოსური სიუჟეტები ანტიკური ხანის კერამიკაზე, ბათუმის მუზეუმების მასალების მიხედვით (ხემძღვანელი, პროფ. მ. გიორგაძე), მარიკა გამახარიამ - არისტოტელეს მოძღვრება სულის შესახებ და მისი რეცეფცია შუა საუკუნეების ინტელექტის თეორიებში (ხელმძღვანელი: პროფ. ლ. ზაქარაძე) და
თათია დავითაძემ - კოსმოგონიური მითოსი ქართულ ფოლკლორში (ხელმძღვანელი: პროფ. თ. შიოშვილი). სტუდენტთა სამეცნიერო კონფერენციის მონაწილეებს სერტიფიკატები და სამახსოვრო საჩუქრები გადაეცათ.

ბათუმის შოთა რუსთაველის სახელმწიფო უნივერსიტეტი პროექტის „უნივერსიტეტის ფართო საზოგადოებისთვის’’ ფარგლებში აბიტურიენტებისათვის ზოგადი უნარების იმიტირებულ გამოცდებს მართავს. ერთიანი ეროვნული გამოცდების იმიტირებული ტესტირება ბსუ-ს საგამოცდო ცენტრში მიმდინარეობს და აჭარის რეგიონის 400-მდე აბიტურიენტი მონაწილეობს. ტესტირების მიზანი აბიტურიენტების ერთიანი ეროვნული გამოცდებისათვის მომზადება წარმოადგენს.