16-18 მარტს პროფესორმა მალხაზ ნაკაშიძემ მონაწილეობა მიიღო კონსტიტუციონალიზმის გლობალურ სამიტში, რომელიც გაიმართა აშშ-ში, ტეხასის უნივერსიტეტში ოსტინში. პროფესორმა მალხაზ ნაკაშიძე გლობალურ სამიტზე #2 პანელზე „საკონსტიტუციო ცვლილებების არქიტექტურა: ისტორია, სამართალი, პოლიტიკა“, პანელისტების: შამშად პასარლაის, ჰუი-ვენ ჩენის, რადიან სალმანის, დაროზა რისტავატის მონაწილეობით, წარადგინა მოხსენება „საქართველოს საკონსტიტუციო ცვლილებების კოდიფიკაციის მოდელი".

16-18 მარტს ჟან მონეს კათედრის ხელმძღვანელმა, პროფესორმა მალხაზ ნაკაშიძემ აშშ-ში მონაწილეობა მიიღო კონსტიტუციონალიზმის გლობალურ სამიტში, სადაც წარადგინა მოხსენება თემაზე: „ევროპის კონსტიტუციურისამართალი და სამართლებრივი განათლების ახალი გამოწვევები საქართველოში, მოლდოვაში, უკრაინაში“. ნაშრომი წარმოადგენს კვლევას, რომელიც მომზადდა ბსუ-ს ჟან მონეს კათედრის პროექტის ფარგლებში. პროექტი დაფინანსებულია ევროკომისიის მიერ და მიზნად ისახავს ევროკავშირის ღირებულებების პოპულარიზაციას, ევროკავშირის შესახებ კვლევებისა და სწავლების განვითარების ხელშეწყობის გზით. კონსტიტუციონალიზმის გლობალური სამიტი (https://law.utexas.edu/the-global-summit/) არის მაღალი სამეცნიერო ღირებულების მქონე ღონისძიება, რომელშიც მონაწილეობენ მეცნიერები მთელი მსოფლიოდან. ღონისძიება ჩატარდა ტეხასის უნივერსიტეტში, ოსტინში, სამართლის სკოლის (https://law.utexas.edu/) საკონსტიტუციო კვლევების ცენტრში, რომელიც არის ერთ-ერთი წამყვანი სამეცნიერო ცენტრი არა მხოლოდ აშშ-ში, არამედ მსოფლიოს მასშტაბით.

ბსუ-ს იურიდიული და სოციალურ მეცნიერებათა ფაკულტეტის იურიდიული კლინიკის ხელმძღვანელმა, იურისტმა ნარგიზ ცეცხლაძემ საქართველოს სკაუტური მოძრაობის აჭარის ორანიზაციისა და იუნისეფის (UNICEF Georgia) ერთობლივი პროექტის „აჭარის სკაუტები ბავშვთა უფლებების დასაცავად, ადრეული ქორწინების პრევენციის მიზნით აჭარის მაღალმთიანეთში” ფარგლებში, შუახევის მუნიციპალიტეტის რესურცენტრში ჩაატარა ტრენინგი თემაზე: „ნაადრევი ქორწინება, გამომწვევი მიზეზები, პრობლემები და მისი აღმოფხვრის გზები“. ტრენერმა მსმენელებს გააცნო ისეთი მნიშვნელოვანი საკითხები როგორიცაა: ნაადრევი ქორწინების მიზეზები, შედეგები, შიდაეროვნული და საეართაშორისო კანონმდებლობა აღნიშნული მიმართულებით, ნაადრევი ქორწინების სტატისტიკა საქართველოსა და სხვა ქვეყნებში.

ბათუმის რაიონული პროკურატურის პროკურორებმა პაატა ცეცხლაძემ და ხატია ჩხენკელმა ფემიციდის წინააღმდეგ ბრძოლის კამპანიის ფარგლებში, ბსუ-ს იურიდიული და სოციალურ მეცნიერებათა ფაკულტეტის სამართალმცოდნეობის სპეციალობის სტუდენტებთან შეხვედრა გამართეს. საინფორმაციო კამპანიის ფარგლებში, პროკურატურის თანამშრომლებმა შეხვედრის მონაწილეებს გააცნეს გენდერის ნიშნით მკვლელობისა და ოჯახში ძალადობის პრობლემატური საკითხები, გამოძიებისა და სისხლისსამართლებრივი დევნის სპეციფიკა, სტერეოტიპული დამოკიდებულებები და გენდერული როლები. შეხვედრის მსვლელობისას აგრეთვე, განიხილეს საქართველოს პროკურატურაში არსებული სერვისები, რომელთა გამოყენებაც შეუძლია ოჯახში ჩადენილი დანაშაულის მსხვერპლს.

ბათუმის შოთა რუსთაველის სახელმწიფო უნივერსიტეტის იურიდიული და სოციალურ მეცნიერებათა ფაკულტეტის ასოცირებულმა პროფესორმა ლაშა ბაჟუნაიშვილმა და ასისტენტ პროფესორმა არჩილ ვარშალომიძემ 26 თებერვლიდან 5 მარტის ჩათვლით მონაწილეობა მიიღეს გერმანიის ფედერაციულ რესპუბლიკაში 5-დღიან ღონისძიებათა ციკლში. ღონისძიება ითვალისწინებდა სამუშაო შეხვედრებს გერმანიის აღმასრულებელი და საკანონმდებლო ხელისუფლების, სამეცნიერო-კვლევითი ორგანიზაციების, პოლიტიკური ფონდებისა და უნივერსიტეტების წარმომადგენლებთან.