2-10 დეკემბერს ბათუმის შოთა რუთაველის სახელმწიფო უნივერსიტეტი ადამიანის უფლებების სამართლის საუნივერსიტეტო კვირეულს უმასპინძლებს. ღონისძიებაში მონაწილეობას მიიღებს საქართველოს 17 უნივერსიტეტი. საუნივერსიტეტო კვირეულს მხარს უჭერს USAID სამართლის უზენაესობის პროგრამა და მისი მიზანია სტუდენტებსა და ახალგაზრდებში ადამიანის უფლებების პრობლემური საკითხების შესახებ ცოდნის გავრცელება და უნივერსიტეტების თანამშრომლობის გზით ადამიანის უფლებების სამართლის შესახებ იდეათა და მოსაზრებათა აქტიური ურთიერთგაცვლა.

20-24 ნოემბერს ბათუმის შოთა რუსთაველის სახელმწიფო უნივერსიტეტის იურიდიული და სოციალურ მეცნიერებათა ფაკულტეტის პროფესორი, ჟან მონეს კათედრის ხელმძღვანელი მალხაზ ნაკაშიძე „ერაზმუს+“-ის აკადემიური გაცვლითი პროგრამის ფარგლებში, აკადემიური ვიზიტით ჩრდილოეთ მაკედონიის უნივერსიტეტ „გოცე დელცევი" - შტიპის იურიდიულ ფაკულტეტს ეწვია. პროფესორმა მალხაზ ნაკაშიძემ უნივერსიტეტის იურიდიული ფაკულტეტის სტუდენტებისთვის წაიკითხა ლექციები ევროკავშირის საკონსტიტუციო სამართლის, ევროკავშირში დემოკრატიის, კანონის უზენაესობის, ასევე საქართველოს ევროპული ინტეგრაციის გამოწვევების შესახებ. ვიზიტის ფარგლებში, მალხაზ ნაკაშიძე ასევე შეხვდა იურიდიული ფაკულტეტის პროფესორებს, ჟურნალ ბალკანეთის სოციალური მეცნიერების მიმოხილვის რედაქტორს მარია ამპოვსკას და ჟან მონეს პროექტის კოორდინატორს ქრიქტინა მიშევას. შეხვედრებისას მხარეებმა მომავალი თანამშრომლობის შესაძლებლობები განიხილეს.

ბათუმის შოთა რუსთაველის სახელმწიფო უნივერსიტეტის იურიდიული და სოციალურ მეცნიერებათა ფაკულტეტის სისხლის სამართლის მიმართულების სტუდენტებისათვის საქართველოს შინაგან საქმეთა სამინისტროს აჭარის პოლიციის დეპარტამენტის საგამოძიებო სამსახურის ხელმძღვანელმა, პოლკოვნიკმა ბერდია ფერაძემ ლექცია წაიკითხა. მომხსენებელმა მომავალ სამართალდამცავებს ოპერატიულ-სამძებრო საქმიანობის და გამოძიების აქტუალური პრაქტიკული საკითხები გააცნო და საინტერესო ქეისები განიხილა. ლექციის დასასრულს, პოლკოვნიკმა ბერდია ფერაძემ სტუდენტების შეკითხვებს უპასუხა. ღონისძიება ბსუ-ს სამართლისა და საჯარო მმართველობის დეპარტამენტის ორგანიზებით გაიმართა.

ბათუმის შოთა რუსთაველის სახელმწიფო უნივერსიტეტში ჟან მონეს ახალი პროექტის - ჟან მონეს მოდული „ევროკავშირში გაწევრიანების პოლიტიკური კრიტერიუმები და საქართველოს, მოლდოვის და უკრაინის ევროპეიზაცია" პრეზენტაცია გაიმართა. ჟან მონეს ახალი სასწავლო მოდული ბათუმის შოთა რუსთაველის სახელმწიფო უნივერსიტეტმა 2023 წელს მოიპოვა ევროკავშირისგან და მომდევნო 3 წლის განმავლობაში განხორციელდება იურიდიული და სოციალურ მეცნიერებათა ფაკულტეტზე. პროექტის კოორდინატორია ჟან მონეს პროფესორი მალხაზ ნაკაშიძე. მოდულის განხორციელებაში ასევე ჩართული იქნება აკადემიური პერსონალი უკრაინის და მოლდოვის რესპუბლიკის უნივერსიტეტებიდან.

ბსუ-ს იურიდიული და სოციალურ მეცნიერებათა ფაკულტეტის სამართალმცოდნეობის საბაკალავრო საგანმანათლებლო პროგრამის სისხლის სამართლის მიმართულების IV კურსის სტუდენტები ასოცირებულ პროფესორ ომარ ფარტენაძის ხელმძღვანელობით დანაშაულის პრევენციის, არასაპატიმრო სასჯელთა აღსრულებისა და პრობაციის ეროვნული სააგენტოს ბათუმის ბიუროს ეწვივნენ. საინფორმაციო შეხვედრაზე ბიუროს თანამშრომლებმა ახალგაზრდებს განუმარტეს უწყების საქმიანობის ძირითადი მიმართულება, სპეციფიკა და უფლებამოსილების განხორციელების თავისებურებები. ბიუროს ხელმძღვანელმა მამუკა თხილაიშვილმა ასევე ისაუბრა იმ სიახლეებზე, რაც ინერგება აღნიშნულ სფეროში საქართველოში. შეხვედრის დასასრულს, პრობაციის ბიუროს ოფიცრებმა უპასუხეს სტუდენტების შეკითხვებს.