ბათუმის შოთა რუსთაველის სახელმწიფო უნივერსიტეტში „სასამართლოს მეგობრის“ (Amicus Curiae) მოსაზრების პრეზენტაცია გაიმართა, რომელიც ერთობლივად მომზადდა თბილისის თავისუფალი უნივერსიტეტისა და ბათუმის შოთა რუსთაველის სახელმწიფო უნივერსიტეტის მიერ. მოსაზრება წარდგენილი იქნება საქართველოს საკონსტიტუციო სასამართლოში საქმეზე ეკა არეშიძე, ქეთევან მესხიშვილი, მადონა მაისურაძე, მამუკა წიკლაური და თამარ ხაჟომია საქართველოს პარლამენტის წინააღმდეგ (საქმე N3/14/1693), სადაც მოსარჩელეები ასაჩივრებენ საქართველოს პარლამენტის მიერ 2021 წლის 30 დეკემბერს „საერთო სასამართლოების შესახებ“ საქართველოს ორგანულ კანონში შეტანილ ცვლილებებს, რომლებითაც სხვა საკითხებთან ერთად განისაზღვრა მოსამართლეთა დისციპლინური პასუხისმგებლობის ახალი საფუძველი და მოსამართლის სხვა სასამართლოში მივლინება.

ბათუმის შოთა რუსთაველის სახელმწიფო უნივერსიტეტში სტუდენტებისათვის ტრენინგი ჩატარდა თემაზე; „პლურალიზმის მხარდაჭერა და სტერეოტიპებთან ბრძოლა“. ტრენინგს უძღვებოდა ბსუ-ს პროფესორი ირაკლი მანველიძე და მოიცავდა ისეთ თემატიკას, როგორიცაა: პლურალიზმის კონტექსტის ანალიზი და ტოლერანტობის აღქმა ახალგაზრდებში, პლურალიზმის და სტერეოტიპების დაძლევა, პრივილეგიების და დისკრიმინაციის დიაგნოსტირება. სწავლების ფარგლებში გაიმართა დისკუსია პლურალისტური გარემოს განვითარებაში ახალგაზრდების როლის მნიშვნელობასა და გამოწვევებზე. შეხვედრის დასასრულს მონაწილეებს სერტიფიკატები გადაეცათ. ტრენინგი თავდაცვისა და უსაფრთხოების სამოქალაქო საბჭოსა და მაქს პლანკის საერთაშორისო მშვიდობის ორგანიზებით გაიმართა.

ბათუმის შოთა რუსთაველის სახელმწიფო უნივერსიტეტში თბილისის თავისუფალი უნივერსიტეტის მოწვეულმა ლექტორმა გიორგი ბერაიამ საჯარო ლექცია წაიკითხა თემაზე „გამოხატვის თავისუფლება - ეროვნული და საერთაშორისო სტანდარტები“. მომხსენებელმა ისაუბრა გამოხატვის თავისუფლების არსსა და მნიშვნელობაზე, უფლებაში ჩარევის ფარგლებსა და მისი შეზღუდვის სამართლებრივ საფუძვლებზე, ასევე, განიხილა საქართველოს საკონსტიტუციო სასამართლოსა და ადამიანის უფლებათა ევროპული სასამართლოს გადაწყვეტილებები, მათი პრაქტიკა და სტანდარტები გამოხატვის თავისუფლებასთან მიმართებაში. საჯარო ლექციაზე გიორგი ბერაიამ სტუდენტების აქტუალურ შეკითხვებს უპასუხა.

ნიუ ვიჟენ უნივერსიტეტის იურიდიული ეთიკის მიმართულება, USAID სამართლის უზენაესობის პროგრამის მხარდაჭერით, ბათუმის შოთა რუსთაველის სახელმწიფო უნივერსიტეტის სამართლისა და საჯარო მმართველობის დეპარტამენტში გამართა საჯარო ლექცია თემაზე: „ხელოვნური ინტელექტის გამოყენება მართლმსაჯულებაში“. საჯარო ლექციას უძღვებოდა ნიუ ვიჟენ უნივერსიტეტის იურიდიული ეთიკის მიმართულების თანახელმძღვანელი, საქართველოს ადვოკატთა ასოციაციის ეთიკის კომისიის წევრი ანა ლორია.

ბათუმის შოთა რუსთაველის სახელმწიფო უნივერსიტეტსა და ანტონ სემიონოვიჩ მაკარენკოს სახელობის სუმის სახელმწიფო პედაგოგიური უნივერსიტეტს შორის გაფორმებული თანამშრომლობის მემორანდუმის ფარგლებში ბსუ მეორედ მასპინძლობს სტუდენტებს აკადემიური მობილობის ფარგლებში. 2023-2024 სასწავლო წლის შემოდგომის სემესტრში იურუდიული და სოციალურ მეცნიერებათა ფაკულტეტის საერთაშორისო ურთიერთობების საბაკალავრო საგანმანათლებლო პროგრამაზე ოთხი სტუდენტი ისწავლის, რომელთაც გვეწვია ლექციებს უცხო ენაზე ფაკულტეტის აკადემიური და მოწვეული პერსონალი წაუკითხავს. მობილობის მონაწილე სტუდენტები, პროფესორები ვლადელენა სოკირსკა და ვიაჩესლავ ოლიცკი ფაკულტეტის დეკანს, პროფესორ ლევან ჯაყელსა და ადმინისტრაციის წარმომადგენლებს შეხვდნენ. გაცნობით ხასიათის შეხვედრაზე უკრაინელებმა დეტალური ინფორმაცია მიიღეს საუნივერსიტეტო ცხოვრებაზე, სასწავლო პროცესსა და დაგეგმილ აქტივობებზე.