ბათუმის შოთა რუსთაველის სახელმწიფო უნივერსიტეტის ტურიზმის ფაკულტეტის სტუდენტები სასწავლებლად ნორვეგიაში გაემგზავრნენ. ახალგაზრდები ტელემარკის უნივერსიტეტში ერთობლივი პროექტის - ,,ნორვეგიაში, საქართველოსა და ყირგიზეთში ტურიზმის მდგრადი განვითარებისა და ინოვაციების სფეროში განათლება“ ფარგლებში ისწავლიან. ტურიზმის ფაკულტეტის 6 სტუდენტი ერთი სემესტრის განმავლობაში ტურიზმის მენეჯმენტის სპეციალობას დაეუფლება, ხოლო ეკოლოგიის სპეციალობის სამი მაგისტრანტი 2-წლიან სასწავლო კურსს გაივლის. კონკურსში მონაწილეობა 110-მა სტუდენტმა მიიღო. პირველ ეტაპზე გადასული 15 სტუდენტიდან გამარჯვებულები ნორვეგიის ტელემარკის უნივერსიტეტის პროფესორებმა - ფრუდე ლენგმა და თემურ აბესაძემ ტრენინგის ჩატარების შემდეგ შეარჩიეს. სტუდენტები რექტორმა, ადმინისტრაციის ხელმძღვანელმა, დეკანებმა, ტურიზმის ფაკულტეტის პროფესორ-მასწავლებლებმა და მშობლებმა გააცილეს.

გერმანიის, რუმინეთის, მაკედონიის უმაღლესი საგანმანათლებლო დაწესებულებების ტურიზმის ფაკულტეტის დეკანები ბათუმის შოთა რუსთაველის სახელმწიფო უნივერსიტეტის რექტორს, პროფესორ ალიოშა ბაკურიძეს და ბსუ-ს ტურიზმის ფაკულტეტის დეკანს როსტომ ბერიძეს შეხვდნენ. ვიზიტის ფარგლებში დაიგეგმა ოთხი ქვეყნის ერთობლივი სამაგისტრო პროგრამის ამოქმედება ტურიზმის მენეჯმენეტის მიმართულებით. პროგრამული აკრედიტაციის გავლის შემდეგ სტუდენტები მობილობის ფარგლებში პარტნიორ უნივერსიტეტებში ერთი სემესტრის განმავლობაში ისწავლიან.

აჭარის მაღალმთიანეთში ბათუმის შოთა რუსთაველის სახელმწიფო უნივერსიტეტის ტურიზმის ფაკულტეტისა და აჭარის ა. რ. ტურიზმისა და კურორტების დეპარტამენტის ორგანიზებით V საერთაშორისო კონფერენცია ჩატარდა თემაზე: ,,ტურიზმი: ეკონომიკა და ბიზნესი“. კონფერენციაზე საქართველოს, გერმანიის, ნორვეგიის, სამხრეთ კორეის, მაკედონიის, უკრაინის, რუსეთის, ბელორუსიის, თურქეთის, აზერბაიჯანის, ირანის, ლიტვის, ყირგიზეთის პროფესორებმა და ტურიზმის ინდუსტრიის წარმომადგენლებმა 100-ზე მეტი მოხსენება წარმოადგინეს. მაღალმთიანი აჭარის პოპულარიზაციის მიზნით კონფერენციას ხიხანის ხეობა მასპინძლობდა. მონაწილეებმა სხალთის ეკლესია და სელიმ ხიმშიაშვილის სახლ-მუზეუმი დაათვალიერეს. დარგის სპეციალისტებს შესაძლებლობა მიეცათ ასევე ადგილობრივ სამზარეულოსა და ხალხურ შემოქმედებას გაცნობოდნენ. ღონისძიების ფარგლებში სტუმრებმა ისტორიული ძეგლები მოინახულეს და ხიხანის ციხე დალაშქრეს. ორდღიანი კონფერენცია მიზნად ისახავდა ახალი ტურისტული პროდუქტების გაცნობას და მთიან რეგიონში ტურიზმის განვითარების პრობლემების გადასაწყვეტად მეცნიერების, დარგის სპეციალისტებისა და ბიზნესმენების ერთობლივ ძალისხმევას.

გარემოს დაცვის მსოფლიო დღე ტურიზმის ფაკულტეტის სტუდენტება მტირალას ეროვნულ ტყე-პარკში აღნიშნეს. ექსკურსია სასწავლო ხასიათს ატარებდა.

I რესპუბლიკური სტუდენტური სამეცნიერო-პრაქტიკული კონფერენცია: „ტურიზმი და ახალგაზრდობა 2014“ ჩატარდა შოთა რუსთაველის დარბაზში. სესია ტურიზმის ფაკულტეტის ორგანიზებით გაიმართა და მასში ბათუმის შოთა რუსთაველის სახელმწიფო უნივერსიტეტის, ილიას სახელმწიფო უნივერსიტეტისა და აკაკი წერეთლის სახელმწიფო უნივერსიტეტის სტუდენტები მონაწილეობდნენ. ახალგაზრდებმა ტურიზმის განვითარების საკითხებზე იმსჯელეს და მოხსენებები ისეთ მნიშვნელოვან თემებზე წარმოადგინეს როგორიცაა: საქართველოს შავიზღვისპირეთში ტურიზმის მდგრადი განვითარების პერსპექტივები, სეზონურობა და ტურიზმზე დამოკიდებულების საფრთხე, ეკოტურიზმის განვითარების პრობლემები და პერსპექტივები აჭარაში. ასევე განიხილეს სამეგრელოს ტურისტული პოტენციალი, აჭარის სასტუმროების მომსახურების ხარისხის კვლევის ანალიზი და რეკომენდაციები, მტირალას ეროვნული პარკი - ტურისტული პოტენციალი და განვითარების პერსპექტივები. კონფერენციის მონაწილეებს სერტიფიკატები და სამახსოვრო საჩუქრები გადაეცათ.