29 ივნისიდან 2 ივლისის ჩათვლით ჟან მონეს კათედრის ხელმძღვანელი მალხაზ ნაკაშიძე მონაწილეობდა პოლიტიკური კვლევების ევროპული კონსორციუმის პარლამენტის სამუშაო ჯგუფის მე-7 კონფერენციაში, სადაც წარადგინა მოხსენება: „პარლამენტის როლი ევროპასთან ინტეგრაციაში: საქართველოს პარლამენტი ასოცირების შეთანხმების შემდეგ“. კონფერენცია გაიმართა საფრანგეთში, პარიზში, Sciences Po უნივერსიტეტის ევროპის კვლევებისა და შედარებითი პოლიტიკის ცენტრში (CEE). კონფერენციაში მონაწილეობა შესაძლებელი გახდა ჟან მონეს კათედრის საგრანტო დაფინანსების და უცხოეთში გასამართ სამეცნიერო ღონისძიებებში მონაწილეობისთვის 2022 წლის მაისში ჩატარებული კონკურსში ბათუმის შოთა რუსთაველის სახელმწიფო უნივერსიტეტისგან მიღებული დაფინანსებით.

ბსუ-ში საქართველოს საგარეო საქმეთა სამინისტროს ლევან მიქელაძის სახელობის დიპლომატიური სასწავლო და კვლევითი ინსტიტუტის საზაფხულო დიპლომატიური სკოლა „საქართველოს საგარეო პოლიტიკა და მისი პრიორიტეტები“ დასრულდა. ბსუ-ს რექტორმა, პროფესორმა მერაბ ხალვაშმა, ლევან მიქელაძის სახელობის დიპლომატიური სასწავლო და კვლევითი ინსტიტუტის ელჩმა მკვლევრებმა: მიხეილ უკლებამ, გიორგი ყარალაშვილმა, ნიკოლოზ რთველიაშვილმა, მერაბ ანთაძემ, თეიმურაზ შარაშენიძემ, სოსო დანელიამ და იურიდიული და სოციალურ მეცნიერებათა ფაკულტეტის დეკანმა, ლევან ჯაყელმა საზაფხულო სკოლის მონაწილე 50 სტუდენტს სერტიფიკატები გადასცეს. დიპლომატიური ინსტიტუტის მკვლევრებმა 28 ივნისიდან 1-ლი ივლისის ჩათვლით ლექციები წაიკითხეს საქართველოს საგარეო პოლიტიკის სტრატეგიულ მიმართულებებზე.

30 ივნისს ჟან მონეს კათედრის ხელმძღვანელი მალხაზ ნაკაშიძე პოლიტიკური კვლევების ევროპული კონსორციუმის პარლამენტის სამუშაო ჯგუფის მე-7 კონფერენციის ფარგლებში, საფრანგეთის პარლამენტს ეწვია. ვიზიტის ფარგლებში კონფერენციის მონაწილეები გაეცნენ საფრანგეთის პარლამენტის ისტორიას, მუშაობის პრინციპებს, ბოლო საპარლამენტო არჩევნების შედეგებს, პარლამენტის როლს ეროვნულ და ევროპულ პოლიტიკაში. ვიზიტი განხორციელდა ევროკავშირის მიერ დაფინანსებული ბსუ-ს ჟან მონეს კათედრის გრანტის ფარგლებში, რომელიც მიზნად ისახავს საქართველოში ევროკავშირის ღირებულებების პოპულარიზაციას, ევროკავშირის შესახებ კვლევებისა და სწავლების განვითარების ხელშეწყობის გზით.

ბათუმის შოთა რუსთაველის სახელმწიფო უნივერსიტეტში საქართველოს საგარეო საქმეთა სამინისტროს ლევან მიქელაძის სახელობის დიპლომატიური სასწავლო და კვლევითი ინსტიტუტის საზაფხულო დიპლომატიური სკოლა „საქართველოს საგარეო პოლიტიკა და მისი პრიორიტეტები“ გაიხსნა. დიპლომატიური ინსტიტუტის მკვლევრები 29 ივნისიდან 1-ლი ივლისის ჩათვლით ლექციებს წაიკითხავენ საქართველოს საგარეო პოლიტიკის სტრატეგიულ მიმართულებებზე. ლექციათა ციკლი მიზნად ისახავს საერთაშორისო ურთიერთობების, საგარეო პოლიტიკის და მომიჯნავე საკითხებზე მომუშავე სამიზნე ჯგუფების საინფორმაციო, ანალიტიკური და კვლევითი პროდუქტით უზრუნველყოფას.

ბსუ-ს იურიდიული და სოციალურ მეცნიერებათა ფაკულტეტის ფსიქოლოგიის საგანმანათლებლო პროგრამის პირველი კურსის სტუდენტების ორგანიზებით, ფსიქოლოგიის ისტორიის სასწავლო კურსის (ხელმძღვანელი, ასისტენტ-პროფ. გურანდა შამილიშვილი) ფარგლებში რეჟისორ დენის განზელის თანამედროვე გერმანული ფილმის „ტალღა’’ ჩვენება და დისკუსია გაიმართა. ფილმში მოთხრობილი იყო გიმნაზიის მასწავლებლის რაინერ ვენჯერის ექსპერიმენტზე, რომელიც მიზნად ისახავდა დაემტკიცებინა თავისი მოსწავლეებისთვის, დიქტატურის პირობებში ცხოვრებას რა გავლენა აქვს პიროვნებაზე და რა სახის ნეგატიურ შედეგებს იწვევს. ღონისძიების დასრულების შემდეგ, სტუდენტებმა და პროფესორ-მასწავლებლებმა ფსიქოლოგიური თვალსაზრისით შეაფასეს ფილმი და მასში ასახულ მნიშვნელოვან და აქტუალურ რობლემებზე, ინდივიდის სოციალური „მე’’-ს ფორმირების სოციალურ-ფსიქოლოგიურ ასპექტებზე ისაუბრეს.