გაეროს ბავშვთა ფონდისა და ნორვეგიის მთავრობის ხელშეწყობით მიმდინარე პროექტის „უნივერსიტეტის შესაძლებლობების გაძლიერება ინკლუზიური სკოლამდელი და ზოგადი განათლების მხარდასაჭერად“ ფარგლებში, ბათუმის შოთა რუსთაველის სახელმწიფო უნივერსიტეტის აკადემიური პერსონალი მონაწილეობს ტრენინგების ციკლში ინკლუზიური და ხარისხიანი განათლების მიმართულებით. პირველ ეტაპზე დაიგეგმა და განხორციელდა ტრენინგები სწავლების უნივერსალურ დიზაინთან, დაწევისა და დაჩქარებული სწავლების კურიკულუმისა და ამ კურიკულუმის საფუძველზე მოსწავლის ინდივიდუალური საჭიროებს გათვალისწინებით ინდივიდუალური სასწავლო გეგმის შემუშავებასთან დაკავშირებით.

ბსუ-ს ბავშვის უფლებათა ცოდნის ცენტრში სტუდენტებისა და ბათუმის სხვადასხვა სკოლის მოსწავლეებისათვის ტრენინგი ჩატარდა თემაზე: „მედია და ბავშვთა უფლებები“. ღონისძიების მონაწილეებს ბათუმის შოთა რუსთაველის სახელმწიფო უნივერსიტეტის რექტორი მერაბ ხალვაში და საქართველოში გაეროს ბავშვთა ფონდის წარმომადგენელი, ბსუ-ს საპატიო დოქტორი ღასან ხალილი მიესალმნენ და სერტიფიკატებთან ერთად, სამახსოვრო საჩუქრები გადასცეს. ტრენინგს თავისუფალ ჟურნალისტთა სახლის თავმჯდომარე ასლან ჭანიძე და გაზეთ „ბათუმელების“ ჟურნალისტი მანანა ქველიაშვილი უძღვებოდნენ.

ბათუმის შოთა რუსთაველის სახელმწიფო უნივერსიტეტში ფრანკოფონიის კვირეული ‘’ფრანკოფონია-2024’’ გაიხსნა. კვირეული სკოლის მოსწავლეების ნახატების გამოფენით დაიწყო და ფრანგული ენის კონკურსით გაგრძელდა. კონკურსში, სახელწოდებით ‘’Bonjour la France’’ რეგიონის საჯარო და კერძო სკოლის მოსწავლეები მონაწილეობდნენ. გამარჯვებულ მოსწავლეებს სერტიფიკატები კვირეულის დასკვნით ცერემონიაზე გადაეცემათ. კვირეულის ფარგლებში, 29 მარტს ბსუ-ში ფრანკოფონიის საუნივერსიტეტო სააგენტოს დასაქმების ფრანკოფონული ცენტრი (CEF) გაიხსნება, რომელიც ხელს შეუწყობს სტუდენტებსა და კურსდამთავრებულებს დასაქმებაში და სამეწარმეო უნარების განვითარებაში.

ბსუ-მ „ერაზმუს+“-ის პროექტის „ინოვაციები კურიკულუმში სოციალური ჩართულობის მხარდასაჭერად“ (CISI) ფარგლებში, საქართველოდან პროექტში ჩართული უნივერსიტეტებისა და არასამთავრობო ორგანიზაციების მენეჯერებისა და ფინანსური მენეჯერების ეროვნულ შეხვედრას უმასპინძლა. ღონისძიებაზე მონაწილეებმა გააანალიზეს პროექტის შუალედური შედეგები, შეაჯამეს პროექტის ფარგლებში მომზადებული და 2021-2022 სასწავლო წლის I სემესტრში ზოგადი განათლების დაწყებითი საფეხურის მასწავლებლის მომზადების ინტეგრირებულ საბაკალავრო-სამაგისტრო პროგრამაში პილოტირებული სასწავლო კურსების შეჯამების მიზნით თსუ-სა და აწსუ-ში გამართული შეხვედრები.

ბსუ-ს ზუსტ მეცნიერებათა და განათლების ფაკულტეტთან არსებული ბავშვთა უფლებების ცოდნის ცენტრის ორგანიზებით, ფოტო-ნახატების გამოფენა „ბავშვები იცავენ თავიანთ უფლებებს“ გაიმართა. ბავშვის უფლებათა ცოდნის ცენტრის მიზანია, ხელი შეუწყოს შესაძლებლობების განვითარებასა და ინოვაციური მიდგომების დანერგვას ინკლუზიური და ბავშვთა უფლებების დაცვის პრინციპებზე დაფუძნებულ განათლებას. ღონისძიებაზე აჭარის, თბილისის, გურიის საჯარო, კერძო და ინკლუზიური სკოლების მოსწავლეებმა ნამუშევრები წარმოადგინეს თანასწორობაზე, მეგობრობაზე, ერთიანობასა და მრავალფეროვნებაზე. გამოფენაში ასევე ჩაერთნენ სპეციალური საგანმანათლებლო საჭიროების მქონე მოსწავლეები კერამიკის საამქროდან, რომლებმაც ღონისძიების მონაწილეებს გააცნეს, თუ როგორ ქმნიან ნაკეთობებს, როგორ ხატავენ და როგორ ნათელ ფერებში ხედავენ სამყაროს.