რაოდენობრივი რისკის მართვის საკითხებზე ნორვეგიულ-ქართულ-რუმინულ-მოლდავურ-უკრაინული საზაფხულო სკოლა გაიხსნა ბათუმის შოთა რუსთაველის სახელმწიფო უნივერსიტეტში. ორი კვირის განმავლობაში ქართველი და უცხოელი პროფესორები ლექციებს წაიკითხავენ რისკის მენეჯმენტთან დაკავშირებულ საკითხებზე, განიხილება რისკის მართვა სოციალური და პოლიტიკური ორგანიზაციების, ხელოვნების, განათლების, ეკოლოგიის, ბიზნესისა და სხვადასხვა მეცნიერების მიმართულებაში. ქართველი, უკრაინელი და მოლდოველი სტუდენტები განიხილავენ კონკრეტულ შემთხვევებს, სამაგისტრო და სადოქტორო პროგრამების დონეზე შეისწავლიან და გაანალიზებენ რისკის მართვას. სწავლების დასასრულს მონაწილეები საზაფხულო სკოლის მუშაობის ანგარიშს და სახელმძღვანელოს წარმოადგენენ.

ბათუმის შოთა რუსთაველის სახელმწიფო უნივერსიტეტის მიზნობრივი სამეცნიერო პროექტის „ზოგიერთი საკითხი ატმოსფეროს დიაგნოსტიკის შესახებ სიგნალისა და გარემოს დისპერსიულ მახასიათებლებს შორის კავშირის საფუძველზე“ ფარგლებში პროექტის მენეჯერმა მირანდა ხაჯიშვილმა მონაწილეობა მიიღო 24-27 სექტმებერს, ლიტვაში, ქალაქ კაუნასში გამარტულ საერთაშორისო სამეცნიერო კონფერენციაში „მე–17 საერთაშორისო კონფერენცია გლობალური კვლევებსა და განათლებაზე, ინტერ-აკადემია 2018“. ახალგაზრდა მკვლევარმა სესიაზე მოხსენება წარადგინა თემაზე: „შემთხვევითი ფაზური ეკრანის გავლით სიგნალის დეტექტირების პრობლემის შესახებ“ (თანამომხსენებელი პროფესორი ნუგზარ ღომიძე), რომელიც ასევე დაიბეჭდა მაღალრეიტინგულ ჟურნალში.

ერასმუს+ PAWER-ის (“Paving the way to interregional mobility and ensuring relevance, quality and equity of access)” პროექტის ფარგლებში ბათუმის შოთა რუსთაველის სახელმწიფო უნივერსიტეტში ტრენინგი ჩატარდა თემაზე: „სწავლის შედეგები და მობილობის ხელშეწყობა“. ტრენერებმა ლია დავითაძემ და ნუგზარ ღომიძემ საგანმანათლებლო პროგრამების ხელმძღვანელებსა და აკადემიურ პირებს ისეთი აქტუალური საკითხები გააცნო, როგორიცაა: სწავლის შედეგების დაგეგმვა საგანმანათლებლო პროგრამებსა და სილაბუსებში, სტუდენტთა მობილობის მნიშვნელობა და ხელშეწყობის მექანიზმები, უცხოეთში მიღებული განათლების აღიარების პროცედურები.